A Casa da Cultura de Outes, no marco do ciclo Outes á Escena, acolle o vindeiro 7 de febreiro, sábado, o espectáculo Un tranvía chamado desexo, da asociación Sen Cancelas. Será ás 20.00 horas e trátase dunha obra para público adulto (maiores de 12 anos). A entrada é de balde ata completar aforamento e repartiranse o propio día da actuación. Esta obra está incluída no bono xeral.
Trátase dunha nova adaptación do texto Un tranvía chamado desexo, un clásico do teatro universal, considerada a obra mestra do dramaturgo estadounidense Tennessee Williams, e que acadou o prestixioso premio Pulitzer en 1948.
Esta obra foi levada ó cine en varias ocasións, e escenificada en multitude de teatros de todo o mundo.
Sen Cancelas Teatro constrúe a súa persoal versión xogando coa ficción e a realidade, presentando un mundo onírico nunha atmosfera cargada e calorosa e enfrontando á súa protagonista co descrédito dos que a rodean e cos seus propios medos e reproches dentro dunha sociedade patriarcal e opresora.
