O concelleiro de Deportes, Carlos Lorenzo, presentou hoxe unha nova edición do Xtosín Trail, a proba que clausurará este domingo, 22 de febreiro, o Trail Series Arousa Neo, tras a primeira cita celebrada en Outes.
A competición sonense, que combina a esixencia técnica do percorrido con paisaxes de grande beleza natural, ofrecerá tres modalidades: unha distancia longa de 21 quilómetros, cun desnivel positivo de 980 metros; unha proba curta de 15 quilómetros, con 750 metros de desnivel; e unha andaina tamén de 15 quilómetros para aquelas persoas que prefiran un formato non competitivo.
Unha vez pechadas as inscricións, a organización prevé a participación de máis de 350 persoas nas tres modalidades. A saída estará situada no porto pesqueiro de Portosín, desde onde os e as participantes iniciarán un percorrido que atravesa algúns dos espazos naturais máis singulares do municipio.
Carlos Lorenzo amosou a súa confianza en que “esta proba, que naceu no ano 2023, volva ter unha gran acollida e todas as persoas participantes poidan desfrutar facendo deporte nunha contorna única e máxica”. Así mesmo, aproveitou para agradecer “o traballo das distintas entidades que colaboran na organización”, destacando a implicación do tecido asociativo e do voluntariado para facer posible o evento.
Coa celebración do Xtosín Trail, Porto do Son converterase esta fin de semana nun referente do trail galego, poñendo o broche final ao circuíto Arousa Neo.
