A Xunta de Galicia activou para este mércores de cinza a alerta laranxa por temporal costeiro en todo o litoral galego. Co obxectivo de garantir a seguridade de bens e persoas, a Dirección Xeral de Emerxencias e Interior, dependente da Consellería de Presidencia, Xustiza e Deportes, informou da situación a través do Centro Integrado de Atención ás Emerxencias 112 Galicia aos concellos das provincias afectadas, deputacións, servizos náuticos, agrupacións de voluntarios de Protección Civil e clubs provinciais, entre outros.
Segundo a Axencia Estatal de Meteoroloxía (Aemet) , o fenómeno meteorolóxico adverso estará activo desde primeira hora da mañá no noroeste da provincia da Coruña. Ao mediodía estenderase ao resto da provincia e a Lugo, e xa pola tarde alcanzará Pontevedra.
As previsións apuntan a mar combinada do oeste ou noroeste con ondas que poden alcanzar os sete metros, así como vento do oeste ou suroeste de ata forza oito. De xeito ocasional, no noroeste da Coruña poderían rexistrarse refachos de ata nove forza.
Pola súa banda, a Secretaría Xeral para o Deporte da Consellería de Presidencia, Xustiza e Deportes anunciou a suspensión da actividade deportiva federada e do programa Xogade no mar nos concellos afectados, que poden consultarse na web Deporte Galego.
A Xunta lembra a importancia de manterse afastado da liña de costa, especialmente de diques, rompentes e paseos marítimos. Así mesmo, recomenda extremar as medidas de seguridade ao realizar calquera actividade no mar e revisar os cabos e amarres das embarcacións ante a previsión de forte ondada e vento.
