O Concello de Rianxo, a través do seu alcalde, Julián Bustelo, informou de que a estación meteorolóxica do Fieitoso (Taragoña) rexistrou no mediodía deste luns 26 de xaneiro a maior precipitación de Galicia cun volume acumulado de 85.7 litros por m2.
Ao longo da mañá rexistráronse múltiples incidencias no municipio rianxeiro, e o novo temporal obrigou, de feito, a cortar a estrada que une as parroquias de Asados e Taragoña, na zona da Laxe por desbordamento do río Te.
O rexedor engadiu que noutros puntos o río está preto de desbordarse tamén, polo que na medida do posíbel o Concello e a Policía Local recomendan evitar as vías que cruzan o río en zonas como o Batán ou Foxacos.
Tamén se rexistraron bolsas de auga en diferentes estradas provinciais.
Bustelo confirmou que a situación semella que non vai mellorar pola tarde e ás 21:00 horas agravarase a situación a costa coa preamar. Dende o Concello e a Policía manterase un dispositivo especial de seguridade por se resulta necesario actuar con algunha incidencia.
