O Concello de Noia presentou a programación oficial da XL edición do Entroido, que este ano se celebra baixo o lema “É Entroido en Noia” e chega cun calendario de actividades ampliado, no que se reforza a programación tradicional ao tempo que se incorporan novas propostas pensadas para todos os públicos.
O concelleiro de Eventos, Abel Pan, amosouse moi satisfeito co programa deseñado para esta edición tan especial, destacando que “é un Entroido que mantén a esencia de sempre, pero que ao mesmo tempo medra e se diversifica, con máis actividades e máis días de festa”. Neste sentido, puxo especialmente en valor a recuperación dun dos actos máis emblemáticos da celebración: “Recuperamos o Paris Dakar tradicional o primeiro venres, o venres 13 de febreiro, unha cita moi querida pola veciñanza e que forma parte da historia do Entroido de Noia”.
Pola súa banda, o tenente de alcalde, Manolo Seijas, subliñou que un dos grandes obxectivos desta edición é potenciar a xornada do sábado. “Queremos que o sábado 14 Noia se converta nun auténtico campo de festa, con distintas discotecas móbiles repartidas pola vila e cun prato estrela como será o evento ‘Noia con marcha: A Noia dos 90-00’, no que faremos unha viaxe ao pasado, á Noia de hai 30 anos, animando a noieses e noiesas a participar con disfraces acordes a esa temática”, explicou.
A programación arrincará o venres 13 coa celebración do Paris Dakar tradicional, que sairá ás 21:00 horas dende o Bar París, con inscrición previa a través de WhatsApp no número 626 77 12 19. O evento rematará na Carpa da Alameda, onde haberá animación musical.
O sábado 14 continuará a festa cun tardeo a partir das 17:00 horas na Carpa da Alameda, amenizado pola Cabina Móbil. Xa pola noite, ás 23:30 horas, celebrarase o gran evento “Noia con marcha”, no que ademais se sorteará unha moto entre as persoas asistentes.
O domingo 15 será a quenda do Bingo de Entroido, que terá lugar ás 20:30 horas na Carpa da Alameda e estará conducido por Patricia Galán, con música e animación durante toda a sesión.
O luns 16 estará especialmente dedicado ao público infantil, cunha festa con inchables e espectáculo de Animart ás 17:00 horas na Carpa da Alameda —que se trasladará ao Polideportivo Alonso en caso de choiva—, ademais do correspondente desfile infantil de disfraces.
O Entroido despedirase provisionalmente o mércores de cinza co tradicional Enterro da Sardiña, que contará coa actuación da Charanga Solfamidas e unha chocolatada ás 19:00 horas na Carpa da Alameda, antes do inicio do enterro ás 20:30 horas.
Finalmente, o venres 20 celebrarase o Gran Desfile de Entroido, o Paris Dakar habitual, que sairá ás 20:30 horas dende o Paseo Marítimo ata o Curro, onde estará instalada a discoteca móbil CDC para poñer o broche final á festa. Os premios deste desfile ascenderán ata os 7.600 euros.
Dende o Concello de Noia destacan que esta XL edición do Entroido supón “un paso máis na aposta por unha das festas máis importantes do calendario local” e animan tanto á veciñanza como ás persoas visitantes a participar activamente nun programa que combina tradición, música, disfraces e moita festa.
