O centro situarase na antiga escola do Cruceiro de Roo e terá capacidade para aloxar 24 persoas
A Xunta de Galicia destinará 2 millóns de euros á construción dunha nova residencia para persoas con discapacidade no concello de Outes (A Coruña), que será xestionada pola Asociación de Discapacitados da Bisbarra de Muros (Adisbismur). O Consello da Xunta deu luz verde á sinatura dun convenio de colaboración entre a Consellería de Política Social e Igualdade e a entidade, que permitirá levar a cabo esta actuación con fondos europeos do Plan de recuperación, transformación e resiliencia (NextGenerationEU).
O novo centro situarase na antiga escola do Cruceiro de Roo, un edificio cedido gratuitamente polo Concello de Outes para a súa adaptación como recurso residencial. A futura residencia contará con capacidade para aloxar 24 persoas. Adisbismur será a encargada de redactar o proxecto definitivo, así como da contratación e do seguimento das obras. O orzamento total da actuación ascende a 2,3 millóns de euros.
Con este novo recurso, o Goberno galego continúa a súa aposta pola creación de servizos de proximidade no medio rural, co obxectivo de favorecer que as persoas con discapacidade que precisan apoio poidan permanecer na súa contorna habitual.
A futura residencia permitirá, ademais, completar a rede de servizos de Adisbismur, integrada actualmente por un centro ocupacional, con capacidade para arredor de medio cento de usuarios, e un centro de día que atende a unha vintena de persoas. Nestes recursos, a Xunta financia 49 prazas, ás que destina preto de 720.000 euros anuais.
