O BNG de Ribeira informa de que prosegue, logo do período de Nadal, a xira Parroquias con Voz percorrendo as parroquias mantendo reunións coa veciñanza do municipio coa finalidade establecer un diálogo directo coa cidadanía, explicar o traballo desenvolvido durante os últimos dous anos e medio de goberno municipal do BNG e presentar os proxectos e investimentos que quedaron planificados e orzamentados para os vindeiros meses.
O responsábel local Rafael Pazos explica que “este proceso servirá ademais para recoller de primeira man as propostas, suxestións e inquedanzas das veciñas e veciños de cada lugar”.
Investimentos nas parroquias de 5,5 millóns de euros en dous anos
O portavoz municipal e ex-alcalde, Luís Pérez Barral, lembra que “neste tempo avanzouse en múltiples ámbitos, especialmente na dotación de servizos básicos nas parroquias chegando á cantidade de 5,5 millóns de euros en tan só 2 anos e medio para pavimentacións, dotación de auga potábel e saneamento”.
Durante estas reunións, o BNG presentará un balance detallado das actuacións realizadas así como dos proxectos xa redactados e que contan con recursos para poder desenvolverse ao longo dos vindeiros meses.
“Deixamos proxectos por valor de 1,4 millóns de euros destinados ás parroquias que van permitir mellorar a calidade de vida da poboación xa que con eles se financiarán servizos básicos como os que mencionamos e son actuacións que nos demandou a veciñanza”, argumentou Barral, engadindo que a organización nacionalista tamén abrirá un espazo de diálogo para que as persoas asistentes poidan expoñer as súas necesidades, prioridades e preocupacións.
As datas e lugares das diferentes reunións serán: Olveira mércores 21 de xaneiro ás 19:30h na casa da cultura, Artes martes 27 ás 19:30h no centro recreativo, Oleiros xoves 5 de febreiro ás 19:30h no centro social e Castiñeiras xoves 12 de febreiro ás 19:30h na casa da cultura.
O BNG anima a toda a veciñanza a participar activamente nestes encontros, que se celebrarán en todas as parroquias do municipio, co obxectivo de seguir construíndo un concello próximo e centrado nas persoas.
