A transferencia atinxe aos servizos e medios persoais e materiais afectos á atención sanitaria
A Corporación municipal de Ribeira celebrou este mediodía un pleno extraordinario e urxente no que se deron pasos decisivos para formalizar a asunción da Unidade de Condutas Aditivas (UCA) por parte do Sergas. Trátase dun servizo que, ao longo dos seus anos de funcionamento, atendeu máis de 3.000 persoas usuarias de toda a comarca.
A alcaldesa, María Sampedro, expresou a súa “satisfacción e orgullo” polo labor realizado pola UCA, destacando “a súa implicación e profesionalidade, que acabou converténdose nunha familia”. Os concelleiros e concelleiras aprobaron por unanimidade o traspaso á Xunta de Galicia dos servizos, persoal e medios materiais vinculados á atención sanitaria prestada pola unidade.
A transferencia inclúe o paso ao Sergas de 12 traballadores. Durante a sesión, a rexedora explicou que xa trasladou á Consellería de Sanidade o convenio existente entre o Concello e a asociación Renacer relativo á asesora xurídica que presta servizo, así como a situación do posto de auxiliar administrativo, cuxo titular expresou a súa vontade de permanecer no cadro de persoal municipal.
O traspaso tamén afecta a seis contratos actualmente en vigor —alarma, telefonía, electricidade, limpeza, ascensor e fotocopiadora— que deixarán de estar asociados ao Concello coa integración da UCA no sistema sanitario autonómico.
Ademais, o pleno aprobou desistir da solicitude de adscrición por 30 anos do inmoble empregado pola unidade, realizada no seu día ante a Tesourería Xeral da Seguridade Social, ao quedar sen efecto polo traspaso ao Sergas a partir do 1 de xaneiro de 2026.
Nas últimas semanas celebráronse varias xuntanzas de coordinación para garantir que o proceso de integración sexa progresivo e non interfira nin na atención ás persoas usuarias nin no traballo diario do persoal da UCA.
