O Concello de Noia celebrará este domingo, 14 de decembro, a VIII Edición das Xornadas de Exaltación do Berberecho, unha cita gastronómica e festiva que terá lugar na Alameda a partir das 13.00 horas. O evento, aberto a veciños, veciñas e visitantes, contará cun donativo solidario de 5 euros, que será destinado integramente a Cáritas e Cruz Vermella.
A degustación ofrecerá unha selección de elaboracións tradicionais preparadas con berberecho de Noia, un dos productos máis emblemáticos da ría de Muros-Noia. Entre as propostas gastronómicas incluiranse empanadas de trigo, empanadas de millo e arroz con berberechos, poñendo en valor a calidade e singularidade deste recurso marisqueiro.
A cita estaba inicialmente programada para novembro, pero tivo que ser adiada pola presenza de toxina no mar, razón pola que se retoma agora “unha vez garantidas todas as condicións sanitarias para o consumo”, segundo informou o Concello.
O concelleiro do Mar, Manolo Seijas, salientou que “esta festa é unha homenaxe ao traballo do sector marisqueiro e unha oportunidade para que a xente coñeza e deguste un produto de máxima calidade como é o berberecho de Noia, ademais cun claro compoñente solidario”.
Pola súa parte, o secretario da Confraría de Pescadores San Bartolomeu de Noia, Adelo Freire, destacou que “estas xornadas son froito do esforzo conxunto do sector, das institucións e da veciñanza, e serven para reivindicar o valor económico, social e cultural do mar en Noia”. Engadiu, ademais, que “o berberecho é identidade, tradición e sustento para moitas familias, e iniciativas coma esta axudan a visibilizar ese labor”.
A organización convida á participación masiva nunha xornada que combina gastronomía, tradición mariñeira e compromiso social, e que volve situar a Noia como referente na exaltación do seu produto estrela.
