O servizo de autobús interurbano da provincia da Coruña quedou totalmente suspendido este venres, 5 de decembro, debido á xornada de folga convocada polos sindicatos CIG, UXT e CCOO. A protesta afecta a todas as liñas que conectan os distintos municipios coruñeses, incluíndo o transporte escolar.
Os sindicatos explican que a convocatoria xorde #ante a paralización do convenio colectivo, que leva catro anos sen avances. Denuncian que as condicións laborais do sector volvéronse “obsoletas” e que a patronal mantén unha “negativa constante” a negociar.
O comité de folga tamén responsabiliza á Xunta de Galicia, á que acusan de “mirar cara a outro lado” e de non intervir para facilitar un acordo que evite a paralización do servizo. Segundo os representantes sindicais, esta falta de implicación supón “un desprezo” cara aos traballadores e cara aos usuarios do transporte público.
Ante a previsión dun impacto elevado, o comité emitiu un comunicado para advertir directamente á cidadanía, ante o temor de que nin a administración autonómica nin as empresas operadoras informen de forma adecuada. Por iso, recomendan aos usuarios buscar alternativas de mobilidade durante a xornada.
A pesar da folga xeneralizada, a medida non afecta o servizo urbano da Coruña, xestionado pola Compañía de Tranvías, que conta cun convenio propio.
