O Concello de Dodro celebrou este sábado a entrega do XXXVIII Premio de Poesía Eusebio Lorenzo Baleirón, nun salón de actos ateigado de público, no que tamén se fixo entrega do Minipremio de Poesía dirixido a alumnado de primaria e ESO.
A gañadora do principal galardón foi a autora Inés Mosquera pola obra Upupú, presentada baixo o lema “A ditadura da bubela”. O xurado destacou que se trata dunha proposta construída “cun poema e o corpo dun animal, unha poética concibida desde a linguaxe do animal, coa súa mesma axilidade e instinto”. Ao recoller o premio, Mosquera amosouse “moi feliz e moi agradecida de estar aquí hoxe e de formar parte dese grupo de autores e autoras que participan da lembranza colectiva da figura de Eusebio Lorenzo Baleirón”, agradecendo tamén o labor de todas as persoas que fan posible a continuidade do certame ano tras ano.
Durante a súa intervención, a autora compartiu unha anécdota persoal relacionada coa figura do poeta homenaxeado, lembrando unha felicitación dun antigo profesor universitario que compartira piso con Eusebio Lorenzo Baleirón e que lle trasladou a vitalidade e a “chispa” que o caracterizaban.
O acto estivo conducido pola coordinadora do premio, Silvia Pena, e contou coa presenza do alcalde de Dodro, Xabier Castro, e do concelleiro de Cultura, Ramón Abuín. No seu discurso, o alcalde destacou o orgullo que supón para o municipio que a gañadora sexa natural de Padrón, subliñando a histórica relación entre ambas localidades e a vontade de seguir dignificando este premio nas vindeiras edicións.
No Minipremio de poesía “Das viaxes e dos soños”, o xurado outorgou o galardón na categoría de educación primaria a Sara Cascallar Novoa polo relato Máis alá das estrelas, do que se salientou a súa “mensaxe inspiradora que convida ao cambio para o benestar social”. Na categoría de ESO, a premiada foi Xulia Otero Blanco polo vídeo-poema Efémera, destacando “o debuxo dun tempo fráxil e un futuro incerto, así como a forza visual e emocional da mensaxe”.
A xornada completouse cun recital poético a cargo de membros do xurado, Noelia Gómez e Miguel Cavadas —gañador da pasada edición—, acompañados pola escritora Alba Mourillós. O acto contou tamén coa actuación musical de Minguante e coa proxección dun vídeo que amosou o proceso de desenvolvemento do premio, desde a súa convocatoria ata a ofrenda floral na tumba de Eusebio Lorenzo Baleirón.
