A Asociación Barbancesa de Axuda e Solidariedade (ABAS), entidade de referencia no eido social da comarca, puxo fin á edición deste ano do seu Programa de Respiro Familiar Re-Conecta, unha iniciativa dirixida a persoas con discapacidade psicoaocial ou intelectual. O programa, que se desenvolveu desde o mes de maio ata decembro, contou cunha ampla oferta de actividades de lecer, como obradoiros, visitas a museos ou viaxes de ocio.
Como broche final, os participantes realizaron a tradicional visita a Vilanova de Cerveira, en Portugal, con posterior parada en Tui, onde gozaron dun día de convivencia e lecer. Ao redor de 70 persoas usuarias participaron nesta saída, pero a repercusión do programa vai máis aló, xa que beneficia a 70 familias, ao ofrecer un espazo de descanso e conciliación para os seus familiares, permitindo un respiro aos coidadores.
O Programa de Respiro Familiar Re-Conecta ten como principal obxectivo mellorar a calidade de vida das persoas con discapacidade e as súas familias, proporcionando un espazo no que os usuarios poidan participar en actividades enriquecedoras e os seus familiares poidan gozar dun tempo de descanso e xestión dos seus propios compromisos.
A Deputación da Coruña colaborou nesta iniciativa achegando unha subvención de 6.758,40 €, que se suman aos 2.744,80 € do programa de investimentos FOIE/2025, que tamén foi destinado á entidade. Estas axudas permiten a ABAS continuar co seu labor de inclusión social e apoio ás familias da comarca, ademais de seguir desenvolvendo novas actividades que fomenten a integración e a participación das persoas con discapacidade.
A Asociación Barbancesa de Axuda e Solidariedade reitera o seu compromiso co benestar das persoas con discapacidade e coas súas familias, e agradece ás administracións e colaboradores a súa implicación para facer posible este tipo de proxectos.
