UCIN Galicia, a través do seu coordinador José Luis Calo, emitiu un comunicado no que expresa a súa preocupación “pola situación económica e política que vive o Concello de Ribeira, logo de anos marcados por débeda, obras con sobrecustes e unha xestión pública afastada das necesidades reais da veciñanza”, sinalou a agrupación engadindo que resulta “evidente que Ribeira necesita un cambio profundo; non podemos seguir atrapados
entre vellos modelos de política que deixaron débeda, improvisación e desconfianza cidadá”.
Neste punto, UCIN Galicia postúlase novamente como “esa alternativa limpa, responsábel centrada nas persoas”, declarou Calo.
No comunicado sinalan que o de Ribeira “é un Concello hipotecado polos erros do pasado” e que “a situación financeira da Administración local continúa lastrada por unha débeda que supera os 9 millóns de euros, ademais de facturas pendentes e proxectos inacabados que impiden avanzar en servizos e infraestruturas”.
Destacan que “a obra da EDAR, o tarifazo no saneamento, os sobrecustes en proxectos como o mercado, o auditorio ou a parada central son exemplos dunha política de gasto sen planificación que agora pagan todos os veciños”. E engaden: “Non se pode aceptar que os mesmos responsables desa etapa sigan ocupando postos clave no actual executivo bipartito. Iso non é cambio, é continuidade”, afirmou o coordinador de UCIN Galicia.
Entre as liñas prioritarias de UCIN para Ribeira destacan:
-Auditoría pública da débeda e das obras executadas nos últimos anos.
-Revisión das taxas e tarifas municipais para aliviar a carga das familias.
-Recuperación da confianza cidadá mediante transparencia orzamentaria e participación veciñal real.
-Impulso do emprego local, comercio e servizos de proximidade.
-Atención prioritaria aos barrios e parroquias, moitas veces esquecidos.
Chamamento á cidadanía
“Ribeira non pode resignarse. Hai talento, enerxía e ilusión neste municipio. UCIN Galicia vai traballar con humildade, pero con firmeza, para ofrecer unha opción política honesta e comprometida co futuro da nosa cidade”, concluíu Calo.
