O conselleiro de Sanidade, Antonio Gómez Caamaño, mantivo este luns unha reunión cunha representación do sector empresarial do Barbanza na que detallou as melloras asistenciais previstas para o distrito sanitario, entre as que salientou a incorporación dunha nova ambulancia medicalizada con base en Ribeira.
Acompañado polo director da Fundación Pública Urxencias Sanitarias de Galicia-061, Román Gómez, o conselleiro explicou que os orzamentos da Xunta para 2026 inclúen os recursos necesarios para poñer en marcha este novo servizo. A previsión é que a ambulancia estea operativa no primeiro trimestre do próximo ano e dea cobertura aos concellos de Rianxo, Boiro, Ribeira, Porto do Son e A Pobra do Caramiñal.
Durante o encontro tamén participou José Ramón González Juanatey, ata hai pouco xefe do Servizo de Cardioloxía do Hospital Clínico Universitario de Santiago, co que se analizaron as melloras que suporá o novo dispositivo no traslado de pacientes con patoloxías cardíacas.
Ademais da ambulancia medicalizada, o Executivo galego destacou outras actuacións previstas para o distrito sanitario de Barbanza. Entre elas figura a licitación da redacción do proxecto do Hospital de Día Oncohematolóxico, que permitirá evitar que os pacientes teñan que desprazarse ao Clínico de Santiago; a adquisición dun novo mamógrafo para o Hospital Comarcal, cun investimento de 326.700 euros; e a mellora da envolvente e da eficiencia enerxética deste centro hospitalario, para a que se reserva un millón de euros.
Na reunión participaron tamén o CEO de Congalsa, Luis Miguel Simarro; o presidente do Grupo JJ Chicolino, Juan José Fajardo; e a directora de Relacións Institucionais de Jealsa Rianxeira, Margarita Hermo.
