Ante as informacións difundidas polo grupo político Unidade Veciñal de Dodro nas que se pon en dúbida a limpeza dos procesos de concesión de licenzas na Administración local (suposto favoritismo na concesión das licenzas), o equipo de Goberno local emitiu un comunicado no que sae ao paso desas acusacións, ás que cualifica de “falsas”.
Explica o Executivo que a empresa Matadero del Sar, S.L. ten solicitado nos últimos meses distintos permisos de obra con distintas finalidades e “todas as licencias seguiron as canles e os procedementos habituais e a empresa pagou os impostos e taxas correspondentes”.
Algunha destas solicitudes está aínda sen resolver, apuntan, engadindo que a firma Matadero del Sar S.L. foi acredora dunha subvención de 1.100.000,00 da Xunta de Galicia, segundo consta no Diario Oficial de Galicia de data 14 de agosto de 2023 e “nesta mesma publicación recóllese que a axuda concedida ten como finalidade incentivar os investimentos para a transformación e comercialización de produtos agrarios”.
No comunicado o Goberno sinala que “estes investimentos non teñen porque ser, como pretende dar a entender UVD, unha única obra e poden incluír a compra de maquinaria, mobiliario ou outro tipo de bens non suxeitos a impostos e taxas municipais”.
Recomendan á agrupación “ler adecuadamente as resolucións de axudas e entendelas” e sinalan que “a propia natureza da axuda obriga a unha transparencia absoluta, unha contabilidade específica que reflicta unicamente o uso dos fondos e a presentación de toda a documentación precisa”.
Así, engaden, “se parte dos fondos son destinados a unha obra, a empresa terá que presentar a licenza correspondente ou a solicitude da mesma”.
Dende o Goberno de Dodro queren destacar que “o investimento total da empresa Matadero del Sar SL en Dodro pretende alcanzar os 3.728.407,83 € polo que é de destacar que a parte privada é moi superior á pública”.
E proseguen: “Emprazamos a Unidade Veciñal de Dodro a que non sega o camiño de outros grupos e se informe antes de publicar bulos que prexudican, máis que ao grupo político que goberna, ao concello e a imaxe de rigor que calquera institución pública debe ter. Tódalas empresas, tódolos grupos políticos e tódolos procesos poden ser criticados desde a sociedade e desde os seus representantes no concello. Esa crítica ten que ser feita coa verdade por diante, o populismo na política non ten cabida”.
