Urdilde converterase esta vindeira fin de semana na protagonista do I Concurso de Tapas Rois nun bocado!, unha iniciativa promovida polo Concello de Rois para promover a hostelería do municipio e recoñecer a creatividade dos seus establecementos.
A primeira edición do concurso bota a andar en Urdilde do venres 7 ao domingo 9 de novembro. As persoas que o desexen poderán achegarse ata o Hotel Camiño do Mar ou a Casa rural Fogar do Selmo para saborear as súas propostas culinarias.
O primeiro ofrecerá unha paella de marisco, mentres que o Fogar do Selmo participará coas súas tostiñas celtas, en dúas versións: unha con presa de porco celta á grella con pan e alioli caseiro, e outra con panceta de porco celta e pan. As tapas teñen un prezo único de 2 euros.
O certame continuará as dúas seguintes semanas noutras tantas zonas do municipio.
En Augasantas, do 14 ao 16 de novembro, participarán a Taberna Angueira e o Restaurante Casa Benjamín; e en Oín, Rois, Seira e Sorribas, farano o Café-bar A Lúa, o Café-bar Malecón, a Taberna O Pemento, o Bar Muelle Rois e o Restaurante Val de Rois entre o 21 e o 23 de novembro.
Os clientes maiores de 18 anos poderán participar no sorteo de tres vales de 100 euros para gastar nos establecementos adheridos sempre e cando completen polo menos tres selos de dúas zonas diferentes. En cada local poderán facerse co tríptico no que deberán poñer os seus selos e tamén votar pola súa tapa favorita. As tapas máis votadas decidirán os establecementos gañadores dos tres premios do concurso, dotados con 300, 250 e 150 euros. Recibirán, ademais, unha placa acreditativa.
O alcalde de Rois, Ramón Tojo, aproveitou a presentación do concurso a semana pasada para explicar que “Rois nun bocado! é unha proposta que nace para poñer en valor o talento dos nosos hostaleiros e a calidade dos produtos locais, ao tempo que se dinamiza a vida social e se promove o turismo de proximidade”.
