Este venres 14 de novembro preséntase en Noia, no Edificio do Casino, o libro Morriña. Gallegos en Suiza, do escritor local (natural do Obre) José M. Martínez, que estará presente no acto xunto co tamén escritor Ramón Carredano e a concelleira de Cultura de Noia, Chelo Martínez Pérez. A cita literaria dará comezo ás 20.00 horas. A vertente musical da presentación virá da man de Habanoia. Trátase dun libro que afonda na nostalxia e nas vivencias da emigración galega en Suíza.
Morriña, xunto con Buscando e O Camiño, do mesmo autor, forman parte dunha triloxía literaria que en formato de relato, historia ou narrativa, que busca “plasmar as vicisitudes de homes e mulleres, especialmente mulleres, que non conformes coa sorte que lle deparou o destino, non dubidan en emigrar a outros países buscando a estabilidade económica e emocional que a terra que lles viu nacer lles nega”.
Morriña é o relato dun home, José Lavandeira, axente de seguros, e unha muller, Carol Loira, dinamizadora social, que se coñeceron casualmente en Zúric e ao longo das súas viaxes polo país helvético, van descubrindo as frustrantes situacións nas que viviron a maioría dos galegos emigrantes en Suíza, na década dos setenta aos noventa.
