O Concello de Rianxo informou de dous proxectos para mellorar o alumeado de infraestruturas, achegando máis sustentabilidade enerxética, eficiencia e aforro.
Por unha banda rematou a obra para a mellora da eficiencia enerxética no Campo de Fútbol Municipal da Lomba (Taragoña). A actuación permitiu mellorar a iluminación do terreo de xogo cun novos focos con tecnoloxía LED e substituír o antigo sistema de calefacción por outro de menor consumo enerxético. Segundo informou o Concello, para acometer esta actuación recibimos unha subvención da Consellería de Presidencia, Xustiza e Deporte da Xunta de Galicia por importe de 60.000€.
Ademais, o Concello recibiu a autorización para a segunda fase do proxecto de substitución de luminarias no paseo marítimo de Rianxo, cuxa primeira fase foi levada a cabo no mes de maio, poñendo o foco no treito comprendido entre Setefogas e A Carballeira. Nas próximas semanas licitaranse os traballos para proseguir a transformación do alumeado público. O alcalde Julián Bustelo sinalou que “antes do remate da lexislatura teremos renovado a totalidade do sistema de iluminación do paseo marítimo para garantir o seu uso e disfrute por parte de toda a veciñanza durante todo o ano e en condicións de seguridade”.
A esta renovación sumarase axiña tamén a renovación do firme do paseo.
