Seguen adiante, materializando boa parte do que será o resultado final, os traballos de remodelación da escaleira de acceso á praia de Tronco, unha vella demanda dos veciños e veciñas que cada verán se achegan a este areal que, polas súas características e importante desnivel, sempre presentou problemas de accesibilidade.
Os traballos achegarán unha estrutura que garanta a súa estabilidade fronte a derrubes de terra e un mellor trazado do acceso e das escaleiras e inclúe pasamáns para garantir a comodidade e a seguridade dos visitantes. Os traballos tamén poñen o foco en achegar estruturas e materiais que se adecúen á paisaxe e á contorna.
O rexedor sinalou que esta actuación foi un dos proxectos que abordamos recentemente na Subdelegación do Goberno con Carlos Gil, Xefe da Demarcación de Costas de Galicia, a quen o Concello agradece “a súa disposición para seguir mellorando o noso litoral”.
O alcalde Julián Bustelo engadiu que “en relación aos accesos peonais ao noso litoral, estamos redactando o proxecto técnico para a mellora do sendeiro que comunica a praia de Tanxil con punta Fincheira. Unha actuación moi necesaria tamén para asegurar a seguridade de todas as persoas que transitan por el”.
