A Unión de Ciudadanos Independientes (UCIN) de Galicia, a través do seu coordinador autonómico José Luis Calo, manifestou a súa “profunda indignación e rexeitamento” polas informacións que apuntan a un uso irregular de fondos públicos por parte do grupo municipal do Partido Popular en Noia.
Segundo os informes da Intervención municipal, o grupo popular podería ter destinado preto de 30.000 euros en comidas, viños e festas cargadas ao Concello, baixo o concepto de gastos de funcionamento do grupo municipal. Estes fondos, segundo UCIN, non podían empregarse para fins partidistas nin para gastos en bares ou encontros con afiliados.
“É absolutamente inadmisible que se utilicen recursos públicos para pagar viños, copas e comidas de partido. A cidadanía de Noia merece respecto e xestores responsables, non prácticas caciquís propias doutros tempos”, declarou Calo.
Ante a gravidade dos feitos, UCIN Galicia reclamou a dimisión inmediata de todos os membros do grupo popular noiés e solicitou unha auditoría completa dos gastos realizados nos últimos anos para determinar posibles responsabilidades políticas ou legais.
O coordinador de UCIN Galicia engadiu que a súa formación “traballa por unha nova forma de facer política, limpa, transparente e centrada nas persoas”. A agrupación fai tamén un chamamento ao resto das forzas políticas e á cidadanía de Noia para defender “unha política honesta, onde cada euro público se destine ao ben común e non aos intereses particulares de ningún partido”.
