Ana Pontón: “Poderán quitarnos o goberno cunha moción vergoñenta, pero non a razón, nin a vontade de facer de Ribeira un lugar mellor para a maioría”, recalca.
Luís Pérez criticou con dureza a moción de censura e contrapúxoa cunha xestión baseada “na honestidade”.
O rexedor deuse un auténtico baño de masas, no que para el é unha evidencia de dignidade. Aplaudido a rabiar antes, durante e despois da súa intervención polos centos de persoas que acudiron á convocatoria e que mesmo corearon consignas contra os asinantes da moción de censura.
A portavoz nacional do BNG, Ana Pontón, cualificou este xoves en Ribeira de “vergoñenta” a moción de censura impulsada polo PP contra o alcalde Luís Pérez, asegurando que esta responde ao “bo traballo” do rexedor e ao avance dun modelo de goberno centrado na maioría social. Pontón augurou que, tras demostrar unha maneira alternativa de gobernar, Pérez “volverá ser o gran alcalde que Ribeira merece”.
Durante un acto de apoio celebrado no auditorio municipal de Ribeira, a líder nacionalista defendeu o modelo impulsado polo BNG no concello, un proxecto que —dixo— sitúa ás persoas no centro, fronte a unha moción de censura que só busca “frear o avance da cidade por intereses partidistas e personalistas”.
“Poderán quitarnos o goberno, pero non a razón, nin a vontade de facer de Ribeira un lugar mellor”, proclamou Pontón, quen tamén denunciou “chantaxes, coaccións e compra de vontades” detrás da operación promovida polos populares.
Pontón expresou o seu convencemento de que a maioría da veciñanza está co proxecto liderado polo BNG, e vaticinou que Pérez volverá á alcaldía. “Hai outra maneira de gobernar: sen favoritismos, sen caciquismo, con diálogo e pensando na xente”, subliñou.
Un modelo de transformación centrado nas persoas
A portavoz do Bloque destacou o traballo realizado polo alcalde e o seu equipo nos últimos dous anos, cun proxecto que apostou pola transparencia, a participación cidadá, a defensa dos servizos públicos de calidade e a valorización do mar como sinal de identidade e motor económico.
Tamén puxo en valor iniciativas para reducir desigualdades, repensar espazos urbanos, protexer o medio ambiente e dinamizar a cultura local, demostrando que é posible gobernar con principios e coraxe.
“Demostraches que un alcalde con principios e cun proxecto claro pode marcar a diferenza”, afirmou Pontón, dirixíndose a Pérez, a quen agradeceu o seu “magnífico traballo”.
Pontón considerou a moción promovida polo presidente da Xunta, Alfonso Rueda, como un “acto de desesperación e pánico” ante o avance do BNG en Ribeira e a consolidación do seu goberno local.
“Gobernar ben molesta a quen prefería o clientelismo á defensa do ben común”, sentenciou.
A líder nacionalista concluíu a súa intervención cunha mensaxe de ánimo e compromiso: “Ribeira nin pode nin vai quedar a mercé de intereses partidistas. Esta moción non vai truncar a esperanza e o orgullo de quen sabe que gobernar para a maioría sempre é máis digno que calquera interese oculto”.
