A raíz das recentes informacións publicadas na prensa sobre supostos gastos efectuados polo grupo municipal do Partido Popular de Noia, anteriormente no executivo local, o actual Goberno do Concello de Noia quixo verificar a veracidade dos feitos recollidos na prensa.
“Trátase”, adiantan, “de gastos inxustificábeis e, nalgúns casos, directamente ilegais, que inclúen pagos en hoteis, comidas para dúas persoas e consumicións sen relación algunha coa actividade institucional ou política municipal”. Para coñecer os detalles destes feitos, o Goberno de Noia vén de contratar unha asesoría xurídica externa e así “avaliar o alcance destes feitos e determinar os pasos legais e administrativos que procedan, co obxectivo de restituír a transparencia e recuperar os fondos públicos empregados indebidamente”.
O alcalde de Noia, Francisco Pérez, sinalou que “as facturas que se están coñecendo non inxustificábies; hai gastos en hoteis, comidas para dúas persoas e conceptos que nada teñen que ver co exercicio da responsabilidade pública. Non imos mirar para outro lado: a cidadanía merece saber en que se gastou cada euro do Concello”.
Pola súa banda, o tenente de alcalde, Manolo Seijas, sinalou que “non estamos a falar de erros menores, senón de prácticas que poñen en cuestión a confianza veciñal. Todos os informes técnicos sinalaban que eran gastos inxustificables, e o Partido Popular utilizou a súa posición no goberno durante anos para escapar ó control e a supervisión do Concello”.
O actual Goberno municipal quere reafirmar deste xeito o seu “compromiso cunha xestión pública baseada na transparencia, a responsabilidade e o respecto absoluto polos recursos de todos os veciños e veciñas de Noia”, indicaron.
