O Bloque Nacionalista de Outes, a través do voceiro Anxo Núñez, pronunciouse sobre a situación do concelleiro tránsfuga Antonio Caamaño, quen logo de militar nas fileiras do PSdG local propiciou o cambio de goberno aliándose co PP (polo que foi expulsado do seu partido).
O grupo nacionalista fixo saber que “xa chegou ao Concello a expulsión definitiva do PSOE ao concelleiro Antonio Caamaño”, polo que a agrupación esixe ao alcalde “a súa expulsión inmediata do Goberno”. Declaran que “o informe de Secretaría Municipal indica, claramente, que unha vez confirmada a expulsión definitiva non poderá formar parte do equipo de Goberno nin ter remuneración” e engaden que “o Partido Popular local coñece, perfectamente, o que indica o informe e xa non quedan máis escusas para mantelo no Executivo”. Indican que Antonio Caamaño “deu o seu voto, e non o dos veciños de Outes, para propiciar que o PP se fixera co Goberno de Outes”.
O voceiro do BNG, Anxo Núñez, recorda que “segundo o informe de Secretaría emitido uns días antes da moción, no momento no que chega a expulsión definitiva do PSdG, o concelleiro tránsfuga, declarado oficialmente ao pasar a non adscritos, non poderá nin formar parte do Goberno nin cobrar polos cargos que desempeña”. Engade que o alcalde e o seu equipo “coñecen perfectamente o contido deste informe da Secretaría Municipal e, polo tanto, dende o BNG, esixímoslles que cumpran coa lei e expulsen definitivamente cesen do seu cargo ao concelleiro tránsfuga”.
