O Concello da Pobra do Caramiñal anunciou que vai solicita á Deputación da Coruña unha subvención para celebrar as xornadas A Pobra do Caramiñal: vive a experiencia. Así se acordou no pleno extraordinario deste 30 de outubro, no que o asunto saíu adiante co voto favorábel de toda a Corporación municipal.
Como explicou a concelleira de Turismo, Estefanía Ramos, o programa levarase a cabo en dúas xornadas con distintas actividades coas que se buscará implicar á poboación local, “facéndoa partícipe desta experiencia e promovendo que comparta cos visitantes a riqueza da nosa contorna e o sentir do noso pobo”. O obxectivo será “resaltar a importancia do turismo como motor económico e como sector clave para o desenvolvemento sostíbel do noso municipio”, incidiu a edil.
Para a realización do programa, o Concello pedirá unha axuda ao ente provincial de preto de 13.413.72 euros. A intención é celebrar A Pobra do Caramiñal: vive a experiencia no 2026 e en dúas xornadas (sábado e domingo). Como explica a concelleira, o programa abranguería todas as actividades que a Concellería de Turismo pon en marcha anualmente para enxalzar os recursos naturais, culturais, patrimoniais e enogastronómicos da Pobra e que buscan que as persoas visitantes gocen dunha experiencia o máis completa posible.
As distintas actividades estarán divididas en función dos catro eixes temáticos (enogastronomía, posta en valor do patrimonio natural, patrimonio cultural e patrimonio histórico), ofrecendo alternativas para todos os gustos e idades. A oferta incluirá catas de viños, mostras de cociña, visitas ás bateas da ría, charlas con expertos en xeografía e patrimonio, viaxes en veleiro, actuacións musicais, visitas teatralizadas, etc. Como parte da iniciativa, prevese a gravación dun vídeo que se empregará para a realización de campañas de difusión e promoción dos atractivos turísticos do concello.
Outros puntos
Na sesión extraordinaria saíron adiante tamén a proposta para destinar 178.932,22 euros da primeira fase do POS+Adicional da Deputación da Coruña a gasto corrente. Así mesmo, recibiu luz verde a modificación da Relación de Postos de Traballo para incorporar unha nova praza de técnico de administración xeral. O pleno serviu para aprobar, ademais, un crédito extraordinario e un suplemento de crédito e recibiu luz verde tamén un recoñecemento extraxudicial de crédito para o pago dunha factura. Na sesión saíu adiante tamén a nova política de seguridade da información por unanimidade.
