Será mañá, venres 10 de outubro, cando teña lugar ás 20 horas a presentación do libro de poesía Constelaciones en la piel, da pobrense Sara Dieste. O lugar elixido para a estrea lírica é o auditorio da Biblioteca da Pobra do Caramiñal.
Ao encontro asistirá a concelleira de Cultura, Patricia Lojo, e a propia autora. A concelleira de Cultura anima á cidadanía a sumarse á actividade para descubrir o traballo de Sara Dieste e para “apoiar o enorme talento local que temos no municipio”.
Indo á obra, Constelaciones en la piel é unha recompilación de poemas na que predomina a dor dunha vida cargada de decepcións e tamén de innumerábeis anécdotas. Na obra, os versos entrelázanse cunha sinxeleza que axuda a que as lectoras e os lectores se vexan identificados nas palabras de Dieste. Ao longo das páxinas, a poetisa abrangue temas universais como o amor, o autocoñecemento e a dor emocional.
