O Concello de Rois celebrou esta mañá a vixésima edición do Día da Bicicleta, unha cita xa consolidada no calendario deportivo e familiar do municipio, que reuniu a arredor de cen persoas de entre 2 e 82 anos.
O participante máis veterano foi o dodrense José Ramón Vigo Ferradas, de 82 anos, quen asegurou antes da saída que acostuma saír en bicicleta dúas ou tres veces por semana, percorrendo uns 30 quilómetros. O máis novo foi Anxo Alonso Tubío, de tan só dous anos, que completou o percorrido nunha cadeira adaptada na bicicleta do seu pai.
A comitiva partiu do polideportivo municipal, onde o Club Ciclista Padronés-Cortizo organizou unha xincana para os máis pequenos. O itinerario de 12 quilómetros levou aos ciclistas por Oín, A Peruca, Lamego, A Meana, Seaxe e O Casal, con parada no punto de avituallamento da praza fluvial de Seira. Desde alí retomaron o camiño por Seira, Oín e Antequeira ata regresar ao polideportivo.
O evento contou coa participación de numerosas familias ao completo e dunha ampla representación da asociación compostelá Aspas.
Para pechar a xornada, celebrouse un sorteo de agasallos entre todas as persoas participantes, grazas á colaboración de AdeMario, o Club Ciclista Padronés-Cortizo e o restaurante Pedra Santa. O premio principal, unha bicicleta de montaña, foi para Carlos Miramontes, mentres que a cea para dúas persoas no Pedra Santa recaeu en Lourenzo Somoza.
A entrega de premios estivo a cargo dos concelleiros de Rois José Luis Ares e Antonio Esparís.
