A agrupación UCIN Boiro emitiu un comunicado crítico co Concello de Boiro, máis en concreto coa súa Área de Cultura, que, en palabras de UCIN, “tomou a decisión de impoñer un custe de 2,50 € por actividades culturais destinadas a nenos de 0 a 3 anos, como os contacontos”. Esta medida, din, “non é só un erro administrativo: é un acto de absoluta insensibilidade e desprezo cara ás familias e a infancia, que xera barreiras económicas inxustas e exclúe aos nenos de quen non poden asumir ese gasto”.
Engaden que “as actividades como os contacontos son ferramentas esenciais para o desenvolvemento cognitivo, emocional e social dos nenos, fomentando a lectura, a imaxinación e a socialización desde os primeiros anos de vida. Cobrar por elas non só é inxusto, senón que contradí os principios fundamentais de igualdade de oportunidades e acceso universal á cultura, que deberían ser piares da política municipal”.
UCIN Boiro considera que “esta medida evidencia unha profunda desconexión do Goberno local coa realidade social de Boiro, así como prioridades equivocadas, ao poñer a recadación económica por enriba do dereito dos nenos para acceder á cultura e á educación”. Por iso, a agrupación reclama ao Concello que elimine de maneira inmediata calquera custo de acceso a estas actividades, garantindo que todos os nenos, con independencia da súa situación económica, poidan gozar da cultura e a aprendizaxe desde a primeira infancia”.
