A Xunta anuncia novos investimentos e concesións para potenciar a actividade náutica e pesqueira en Rianxo
A conselleira do Mar, Marta Villaverde, visitou hoxe o porto de Rianxo acompañada polo presidente de Portos de Galicia, José Antonio Álvarez, para analizar as necesidades desta infraestrutura e manter encontros con representantes do sector náutico e pesqueiro.
Durante a xornada, Villaverde destacou o potencial da náutica de lecer como motor económico das vilas costeiras e confirmou que Portos de Galicia está a tramitar unha concesión ao Club Náutico de Rianxo para construír e explotar novas instalacións náutico-recreativas cun investimento estimado de 1,7 millóns de euros por parte da entidade. A conselleira informou de que xa se recibiu o informe favorable do Ministerio para a Transición Ecolóxica, o que permitirá avanzar na tramitación.
Así mesmo, visitou as melloras executadas no porto, entre elas a instalación de novas luminarias LED, cun investimento de 270.000 euros, e a renovación do firme da explanada diante da lonxa, cun orzamento de 73.000 euros, obras que se atopan a piques de finalizar.
A titular de Mar tamén mantivo unha reunión coa Confraría de Pescadores de Rianxo, enmarcada na rolda de visitas que está a realizar a todos os pósitos galegos para coñecer de primeira man as súas demandas e traballar en medidas que melloren a competitividade e sustentabilidade da actividade pesqueira.
Por outra banda, Villaverde anunciou a concesión ao Club de Piragüismo de Rianxo para a ocupación do edificio de deportes náuticos, cunha bonificación do 90% das taxas portuarias pola súa actividade formativa. Ademais, Portos de Galicia tramita outra concesión ao Club de Remo para o uso dun almacén e área de adestramento, tamén susceptible de beneficiarse da mesma redución.
