O veleiro Laion, embarcación cedida en garda e custodia á asociación muradá ADISBISMUR (entidade membro de COGAMI), volve izar velas para ofrecer a experiencia da navegación a vela a persoas con discapacidade. Nesta nova edición do proxecto Galicia Vela Adaptada (GAVEA), un total de 83 persoas poderán participar nas travesías programadas na ría de Camariñas entre o 9 e o 19 de setembro.
Segundo informou COGAMI o proxecto foi iniciado no ano 2002 trala cesión do veleiro incautado ao narcotráfico, e conta con adaptacións específicas que facilitan o acceso e a participación de persoas con mobilidade reducida. Entre elas destacan un guindastre na botavara para embarcar desde o peirao flotante e un winche eléctrico con premedor que simplifica o manexo das velas.
Con base no porto de Muxía, as travesías, sempre que o tempo o permita, desenvolveranse en quendas de mañá (11:00-14:00 h) e de tarde (16:00-19:00 h). Cada saída contará con cinco persoas participantes acompañadas por monitorado, procedentes de diferentes entidades e centros de COGAMI de toda Galicia: Lugo, Santiago, Val do Dubra, Muros, Ourense, Ribeira, Cabana de Bergantiños, Arzúa, Silleda e A Coruña.
Calendario de participación
Martes 9 de setembro: Asociación ALUCEM (Lugo), na quenda de mañá.
Mércores 10: Asociación AVANTE (Val do Dubra), na quenda de mañá.
Xoves 11: Asociación ADISBISMUR (Muros), nas quendas de mañá e tarde.
Venres 12: Persoas usuarias do programa de autonomía de COGAMI no CEGADI de Santiago (mañá) e asociación AIXIÑA de Ourense (tarde).
Martes 16: Asociación AMBAR (Ribeira), pola mañá, e persoas usuarias do programa de COGAMI no CEGADI (tarde).
Mércores 17: Asociación ÍNTEGRO (Costa da Morte), nas quendas de mañá e tarde.
Xoves 18: Asociación AMARAI (Arzúa e Terra de Melide) na quenda de mañá.
Venres 19: Centro de atención diúrna de Medelo (Silleda), pola mañá, e asociación ALCER Coruña, na quenda de tarde.
Para poder levar a cabo esta experiencia, o proxecto GAVEA conta coa colaboración da Deputación da Coruña e tamén de fondos do 0,7% d IRPF das persoas contribuíntes que marcaron o recadro de Actividades de Interese Social, que xestiona a Xunta. Ademais, conta coa colaboración da asociación Cataventos, a través das persoas voluntarias Noemí Bermúdez, Marcos Trillos, Carlos Fernández e Aurelio Trillo.
