O Cámping A Vouga, na praia de San Francisco (Louro, Muros) vai acoller este mes de outubro unha xornada de portas abertas. O motivo é a vindeira saída a licitación da xestión das instalacións do complexo hostaleiro e de lecer en Louro, unha vez que xa caducou a actual concesión. Por este motivo, o Goberno local organiza unha xornada de portas abertas para “que todas as persoas interesadas poidan visitar o complexo e achegar as súas dúbidas e inquedanzas”. A xornada será o luns 6 de outubro ás 17:00 horas.
“O Cámping da Vouga é unha referencia na comarca, xa que leva máis de 50 anos aberto, e temos constancia do interese que hai na súa xestión, polo que antes de abrir o proceso de licitación queremos que se poida coñecer o estado das instalacións para que as propostas sexan axustadas e viábeis”, sostén a alcaldesa de Muros, María Lago.
“Coa xornada de portas abertas, as persoas interesadas poderán visitar con calma o cámping, ver en que estado está o comedor, a cociña ou a obra que habería que executar coa licitación”, explica a alcaldesa.
“Ademais, o noso obxectivo é facer un proceso aberto, que calquera persoa o empresa poida presentar unha oferta”, remata Lago.
