Este sábado 20 de setembro de 2025 temos unha cita solidaria en Noia coa tradicional camiñada contra o cancro: a andaina Noia en marcha contra o cancro, que ten a saída prevista ás 17.00 horas dende a Alameda e presenta un percorrido de tres quilómetros (dende a Alameda pasando polo centro histórico, o paseo marítimo e de volta á Alameda). O prezo será de 8 euros para adultos e de 5 euros para crianzas de ata 12 anos. As persoas ás que non lles sexa posíbel participar na andaina de xeito presencial, poderán colaborar de xeito alternativo a través do dorsal solidario. A recollida de dorsais e camisetas será o mesmo día 20 de setembro, de 11:00 a 16:30 h na Alameda. A organización adianta que ao remate do percorrido, haberá sorpresas para as persoas participantes. Quen teña interese en formar parte da andaina pode facelo a través da web de En Marcha contra o Cancro.
