Dúas persoas, unha nai e o seu fillo, tiveron que ser trasladadas ao Hospital do Barbanza para recibir atención sanitaria tras un incendio declarado nunha vivenda unifamiliar en Lugar Sobrido, Oleiros.
O 112 Galicia recibiu o aviso arredor das 19:50 horas, cando un particular informou do lume. De inmediato, solicitouse a intervención dos Bombeiros de Ribeira e de Boiro, do GAEM de Ribeira e dos axentes da Policía Local.
Ao chegar ao lugar, os equipos constataron que o incendio xa estaba sufocado, polo que a súa actuación se limitou a facer comprobacións e á ventilación da vivenda. Segundo indicaron, o lume afectou principalmente a varios mobles da cociña.
A nai e o fillo foron trasladados polo Servizo de Urxencias Sanitarias de Galicia-061 ao centro hospitalario por baixa saturación de osíxeno.
