Dous homes feridos, un deles grave, nunha pelexa con martelo en Vilagarcía vinculada ao tráfico de drogas
Dous homes quedaron feridos, un deles grave, en Vilagarcía de Arousa por unha pelexa con uso de martelo vinculada co tráfico de drogas.
A Policía Local recibiu o aviso arredor das 08:30 horas, cando unha persoa alertou dunha liorta con ferramentas de ferraxaría na rúa da Pena, no barrio de Trabanca Badiña. Ao chegar, as patrullas atoparon a un home de 42 anos tendido no chan, en convulsións e rodeado de abundante sangue. O 061 mobilizou un soporte vital básico e outro avanzado para trasladalo de urxencia ao Hospital do Salnés.
O segundo implicado, tamén de mediana idade, abandonou o lugar pero foi localizado pouco despois con diversas lesións. Tamén foi ingresado no Hospital do Salnés, onde permanece baixo custodia da Policía Nacional.
No lugar apareceu o martelo supostamente utilizado na agresión. As primeiras investigacións apuntan a que a pelexa estaría relacionada cun conflito vinculado co tráfico de drogas.
