Ventos suaves de brisa cálida marcaron o inicio da Regata da Muller, que se disputa no Centro Galego de Vela e reúne a regatistas de cinco comunidades autónomas.
A competición arrancou ás 14.00 horas, cun vento do suroeste que fixo posible a montaxe dun campo de regatas en condicións practicamente ideais: mar en calma e un eixo perfecto entre o barlovento, procedente da Illa de Arousa, e o sotavento, situado entre as Malveiras e Cortegada.
Aínda que a meteoroloxía foi excelente, a caída puntual do vento obrigou ao acurtamento dunha proba e á anulación doutra, circunstancia que o Comité, presidido pola oficial Loli Camba, soubo resolver validando finalmente as tres mangas previstas para esta primeira xornada.
O equipo de Canarias, con Cristina Martínez Doreste á fronte, foi o gran protagonista do día e colócase líder con 4 puntos grazas a uns parciais de 2-1-1. En segunda posición provisional, con 7 puntos (1-3-3), figura a Federación Catalá de Vela, representada polas deportistas do Club Nàutic El Balís, con Jana Rahola como patroa. O Monte Real Club de Yates de Baiona, patroneado por Aitana Pérez, ocupa a terceira praza con 11 puntos (3-6-2).
A segunda xornada celebrarase mañá a partir das 12.00 horas, cun programa amplo para tratar de completar o maior número de mangas posible.
A Regata da Muller está organizada polas Reais Federacións Española e Galega de Vela, co patrocinio da Secretaría Xeral para o Deporte da Xunta de Galicia, a Deputación de Pontevedra e Ence – Plan Social.
