A ANPA Santa Uxía do CEIP O Grupo de Ribeira convocou para o luns 29 de setembro unha xornada de mobilizacións para esixir solucións ás carencias do centro educativo. Baixo o lema “O Grupo quere profes!!”, as familias organizarán caceroladas e concentracións ao longo do día.
O calendario inclúe unha concentración ás 11:30 horas no propio colexio e, xa pola tarde, ás 19:30 horas diante do Auditorio Vello —onde se celebra o pleno do Concello— para facer visible a súa protesta. A continuación, ás 20:00 horas presentarán unha moción cidadá no pleno municipal, co obxectivo de defender os dereitos do alumnado. O remate da xornada está previsto para as 21:00 horas.
Entre as principais reclamacións figuran a falta de profesorado —como o titor de 3ºB ou profesorado NEAE—, a ausencia de apoios e coidadores, a dimisión do equipo directivo que non foi aceptada pola administración, obras sen rematar e problemas de espazo, así como dificultades para atender correctamente ao alumnado.
A ANPA fai un chamamento á cidadanía de Ribeira para que se sume ás mobilizacións e apoie as reivindicacións no pleno municipal. “Xunta, escoita, O Grupo está en loita”, destacan no seu comunicado.
