As autoridades activaron un dispositivo de busca en Rianxo para tratar de localizar a Josefina García, unha muller de 81 anos da que non se ten noticia desde a tarde do martes.
Segundo informaron fontes municipais, a alerta de desaparición foi dada polos seus familiares ao decatarse da súa ausencia no domicilio, situado na rúa Gudiños. Ante a falta de novas, ao redor das 21:00 horas púxose en marcha o protocolo de busca, coordinado pola Policía Local da vila.
O propio alcalde de Rianxo, Julián Bustelo, fai un chamamento á cidadanía para que colabore coa localización da veciña desaparecida. Calquera persoa que poida achegar información sobre o seu posible paradoiro pode facelo chamando ao 112 ou ao número de contacto directo 609 862 222.
As tarefas de procura continúan este mércores, con participación de efectivos municipais e voluntariado.
