A Anpa do CEIP O Grupo de Ribeira participou este sábado na manifestación convocada en Santiago de Compostela pola CIG-Ensino en defensa do ensino público. Ao acto sumáronse tamén outras anpas da Barbanza, como a de Asados, xuntándose un grupo de arredor de medio cento de persoas procedentes de Ribeira.
Na comitiva estaban presentes membros da Anpa Santa Uxía, profesorado do propio centro, nais e pais de alumnado de 3º de Primaria, estudantes, a directora do colexio Nieves Lampón, así como docentes doutros centros do municipio, como Aguiño e Frións. Tamén participaron representantes políticos, entre eles a concelleira de Educación de Ribeira, Cruz Rivadulla, e os concelleiros Veva e Francisco Suárez-Puerta.
O colectivo levaba a súa propia pancarta cos lemas «O Grupo quere profes e Xunta escoita» e «O Grupo está en loita!», consignas que foron coreadas ao longo do percorrido xunto a outras como «Os nenos do Grupo teñen dereitos» ou «Menos recortes, máis educación».
A manifestación, que contou coa participación de máis dun milleiro de persoas e o apoio da Confederación de Anpas de Galicia, percorreu as rúas do centro compostelán desde a Alameda ata Praterías, pasando polo Hórreo, o Toural e a rúa do Vilar.
O presidente da Anpa, Unai González, interveu en varios medios de comunicación para expor a problemática que afecta ao CEIP O Grupo.
De cara á próxima semana, o colectivo recorda que este luns 15 de setembro está convocada unha concentración ás 11:30 horas diante da porta principal do colexio, que incluirá unha cacerolada e a lectura dun manifesto. Pola tarde, ás 18:00 horas, celebrarase unha Asemblea Xeral de familias e profesorado á que tamén están convidados os medios de comunicación.
