Dende esta pasada fin de semana podemos visitar unha nova exposición no Barbanza: a mostra fotográfica As Mil Caras de Montelouro de Suso Montero, que foi inaugurada na Sala de Exposicións da Casa da Cultura de Porto do Son e que estará dispoñíbel para desfrutala até o vindeiro 14 de agosto (con entrada libre). Na apertura da mostra Montero estivo acompañado polo alcalde Luis Oujo e máis a concelleira de Cultura, Alicia Martínez. Na colección de fotografías, tal e como se explica no seu título, réndese homenaxe a un dos grandes emblemas paisaxísticos e ambientais da ría de Muros e Noia e de toda a costa galega: o monte Louro. Suso Montero (1961) é un profesor e fotógrafo compostelán afincado en Porto do Son.
A mostra acompáñase dunha cita literaria do escritor norteamericano Paul Auster que nos achega unha clave para afrontala e comprendela en todos os seus detalles: “Se non te tomas tempo para mirar, nunca conseguirás ver nada”.
