A arpista Noela Cotuna ofreceu un concerto na tarde deste venres 1 de agosto, na Igrexa de Santa Maria A Nova e no marco da terceira xornada de celebración do Noia Harp Fest.
Cotuna, galardoada tanto a nivel nacional como internacional pola súa técnica e calidade interpretativa (e que ten actuado baixo a batuta de figuras recoñecidas como Kill Petrenko, Zubin Mehta, Daniel Barenboim ou Gustavo Dudamel) é un dos pratos fortes desta edición do festival. Na súa actuación, a actual arpa solista da Orquestra de la Comunitat Valenciana (OCV) rendeu homenaxe á intérprete e compositora francesa Henriette Renié no 150ª aniversario do seu nacemento.
Lembramos a axenda de mañá, sábado 2 de agosto.
12.30h | Igrexa de San Francisco
El concierto secreto. Con Juliette Commeaux & Laia Blasco (en colaboración con AEDA)
20.00h | Claustro de San Francisco
Bleuenn Le Friec. Con Uxía e Faia
22.00h | Praza do Tapal
Quico Comesaña
Ana Crismán
A seguinte e derradeira xornada desta 12ª edición terá lugar o 7 de agosto no Teatro Coliseo Noela, coa estrea mundial de Cuatro historias gallegas, a obra coa que o arxentino Federico Beilison obtivo o III Premio Internacional de Composición Portus Apostoli.
A Real Filharmonía de Galicia será quen interprete a peza, baixo a batuta de Sebastian Zinca, e coas arpistas Claudia Besné e Francesca Romana Di Nicola como solistas. As entradas para esta cita, a única de pago do NHF, están á venda en Ataquilla.com.
