O mundo da cultura galega está de loito pola morte do actor, dramaturgo e director Manuel Lourenzo Pérez (Ferreira do Valadouro, 1943), falecido na madrugada deste domingo na Coruña aos 82 anos. O seu corpo será velado no tanatorio Servisa e posteriormente incinerado na intimidade familiar.
Recoñecido popularmente polos seus papeis televisivos en series como Mareas Vivas —onde interpretaba a Melgacho— ou Fariña —no papel de Vicente Otero, “Terito”—, Lourenzo deixa un legado inmenso no teatro galego, ámbito no que destacou como creador, docente, tradutor, ensaísta e dinamizador cultural.
Licenciado en Interpretación polo Institut del Teatre de Barcelona e mestre de formación, foi pioneiro na creación de grupos e compañías independentes desde os anos sesenta. En 1978 refundou a Escola Dramática Galega e en 1980 puxo en marcha a Compañía Teatral Luís Seoane.
A súa obra dramática, con máis de 150 pezas escritas e catro ensaios sobre teatro galego, valeulle recoñecementos como o Premio Nacional de Literatura Dramática (1997, por Veladas indecentes) e o Premio Nacional das Artes Escénicas (2008).
No audiovisual, participou en máis de quince series e filmes como O lapis do carpinteiro, Os mortos van á presa ou Entre bateas. En 2021 recibiu o Premio Fernando Rey da Academia Galega do Audiovisual na gala dos Mestre Mateo, e en 2024 foi distinguido co Premio da Cultura Galega.
A súa traxectoria deixa unha pegada profunda no panorama cultural e artístico de Galicia, sendo lembrado como un referente imprescindible para o teatro e as artes escénicas do país.
