A Asociación Ambar das Persoas con Diversidade Funcional, con sede no Barbanza, está a celebrar o éxito e o impacto positivo do seu proxecto Comunidade: Apoio en Contextos Naturais, destacando a historia inspiradora de Irene, unha persoa usuaria que acadou unha maior autonomía no seu tempo de ocio.
O proxecto, co-financiado por Fundación “La Caixa”, conta co apoio e a colaboración dos Concellos de Ribeira, A Pobra do Caramiñal, Boiro, Rianxo e Porto do Son, e ten como obxectivo principal que as persoas con diversidade funcional poidan elixir e participar plenamente nos recursos e actividades das súas contornas naturais, garantindo así o seu dereito a unha vida independente na comunidade.
Irene, unha das participantes no proxecto, manifestou o seu interese en gozar do seu ocio de elección propia. A través do acompañamento e o apoio proporcionado por Ambar, a moza puido levar a cabo as súas actividades preferidas de forma autónoma, demostrando que a verdadeira inclusión radica na posibilidade de decidir e participar activamente sen barreiras.
“O caso de Irene é un claro exemplo de que o noso traballo está dando froitos”, sinalou Marta Alende, terapeuta ocupacional de Ambar e coordinadora do proxecto, engadindo que “o noso compromiso é apoderar a cada persoa para que sexa a protagonista da súa propia vida. Cando unha persoa pode elixir como, onde e con quen goza do seu tempo libre, estamos a construír non só autonomía e confianza, senón tamén unha sociedade máis xusta e accesíbel para todas as persoas”.
Ambar, que leva máis de 40 anos traballando na comarca da Barbanza, reitera deste xeito a súa “aposta por este modelo de intervención, que busca saír do centro para achegar os apoios directamente á comunidade, fomentando así a participación e a conexión social”. O proxecto segue en marcha e dende a asociación animan a todas as persoas con diversidade funcional que desexen gañar autonomía e apoderamento a informarse e sumarse á iniciativa. Para máis información sobre o proxecto ou para inscribirse, as persoas interesadas poden contactar no teléfono 647 60 96 40, escribir un correo a comunidade@asociacionambar.org ou cubrir o formulario dispoñíbel na Rede.
