O sábado 9 de agosto, encadrada na celebración da Festa do Polbo de Porto do Son, celebrarase unha nova edición da Andaina do Polbo, unha actividade que complementa a exaltación do cefalópodo reivindicando paisaxe, cultura, medio ambiente, confraternidade deportiva e gastronomía. Será un percorrido de dificultade moi alta e de 23 quilómetros de distancia, con saída dende Boiro (con bus dende a fachada marítima de Porto do Son ás 8.00 horas). Para as inscricións e para obter máis información cómpre enviar un correo a osoncamina@gmail.com. Será preciso incluír no correo o nome completo das/dos participantes, os DNI, os teléfonos e as datas de nacemento. As prazas son limitadas. A andaina terá un custe de 10 euros. A Festa do Polbo propiamente dita celebrarase ao remate da andaina e incluirá como de costume música tradicional, degustacións de polbo e concertos nocturnos para pór o broche de ouro a unha das exaltacións gastronómicas de meirande relevancia en toda Galicia e que este ano chega á súa XXXI edición.
