A Asociación Boirense de Empresas (ABE) fixo un balance da súa campaña estival Quincenas Fantásticas, que, en palabras da patronal, converteuse nun “novo éxito” e “está a converterse nun referente para dinamizar o consumo local durante o verán e premiar aos clientes que apostan polo comercio de proximidade”.
A primeira quincena da campaña, celebrada entre o 1 e o 15 de xullo, pechouse con 2.000 rexistros de compras, acadando así o récord histórico de participación nunha quincena, superando o anterior máximo de 1.889 tíckets rexistrados en anos anteriores. Ademais, esta cifra practicamente duplica os rexistros da quincena inmediatamente anterior, na que se contabilizaron 1.032 tíckets, o que demostra o forte efecto incentivador da iniciativa, engadiron fontes da ABE.
Persoas gañadoras da Primeira Quincena Fantástica:
-Diego gañador de 250€ por unha compra realizada en Atmosfera Sport – Deportes Brincos.
-Ana Pombo gañadora de 150€ por unha compra realizada en Princesas y príncipes.
-Ana Mª Rodriguez García, gañadora de 100€ por unha compra realizada en Alimentación Teresa.
Os premios entréganse en Bonos ABE, que só se poden gastar nos negocios asociados, reforzando así o impacto directo desta iniciativa no tecido comercial local. O listado de establecementos participantes está dispoñíbel na web da ABE.
Daniel García, presidente da entidade empresarial boirense, destacou que “esta resposta confirma o compromiso da veciñanza co comercio local” e que “cada tícket rexistrado é unha mostra de apoio ás pequenas empresas que dan vida ás nosas rúas”. Ademais, subliñou que “iniciativas coma esta contribúen a reactivar a economía local, fidelizar clientes e xerar movemento nunha época clave como o verán”.
A ABE engade que “aínda que xa temos os primeiros gañadores, queda tempo para participar: todas as compras rexistradas entre o 16 de xullo e o 3 de agosto entrarán no segundo sorteo, que terá lugar o 4 de agosto”.
A campaña está cofinanciada pola Xunta de Galicia.
