O Real Club Náutico de Portosín xa está preparado para albergar o primeiro Campionato Galego de Wingfoil, unha innovadora modalidade do deporte da vela que promete revolucionar as augas galegas. A cita, organizada polo club anfitrión en colaboración coa Real Federación Galega de Vela, reúne a unha destacada nómina de deportistas tanto a nivel autonómico como nacional e internacional.
Entre os rexistrados destaca a participación do regatista olímpico Iago López Marra, natural de Portosín e principal impulsor desta disciplina en Galicia. A súa presenza dá un carácter especial a un campionato que nace con vocación de consolidarse como unha referencia no calendario náutico galego.
Xunto a el, competirán nomes como Francisco Robleda, membro dunha recoñecida saga familiar vinculada á vela; Beatriz Lence, regatista de alto nivel na Clase Láser (actual ILCA); e o windsurfista Tomás Vieito, habitual en competicións internacionais como parte do equipo español.
As probas, deseñadas para maximizar o espectáculo e a técnica, desenvolveranse nun campo de regatas montado con boias ao vento, favorecendo os tramos en cinguida e minimizando os cruces entre participantes, que practicamente “voarán” sobre a auga grazas á tecnoloxía do wingfoil, tanto en altura como en velocidade.
O campionato reunirá a representantes de clubs de gran prestixio, como o Liméns W.S.C., o Club Náutico Castrelo de Miño, o Saint Francis Yacht Club (California), o Real Club Náutico da Coruña, o Real Club Náutico Rodeira de Cangas, o Real Club Marítimo de Málaga, e o Real de Portosín, anfitrión do evento.
O Top de saída está previsto para as 11:00 da mañá, marcando o inicio dunha xornada que supoñerá un reto organizativo e técnico para o comité de regatas, nun escenario que conxuga deporte de elite, innovación e paixón polo mar.
