O Concello de Ribeira xa conta con novos axentes para reforzar, este verán, a actividade da Policía Local. Serán un total de 8 profesionais que se incorporarán durante a tempada estival e permanecerán ata o mes de decembro. “Grazas a estas incorporacións poderase garantir unha maior seguridade cidadá, especialmente durante os meses de verán, nos que a poboación increméntase de xeito significativo debido á chegada de visitantes e nos que hai moitas celebracións”, informaron os representantes do Concello no acto oficial de recepción das e dos novos policías.
Ademais, dende o Consistorio informan que nos últimos dous anos o número de axentes fixos da Policía Local de Ribeira aumentou en tres, “consolidando así un cadro de profesionais máis amplo para atender as incidencias”.
O alcalde de Ribeira, Luís Pérez, subliñou que “sabemos que temos que seguir nesta liña de aumentar axentes pero estamos facéndoo de maneira progresiva e na medida que temos recursos dispoñíbeis”.
Segundo o rexedor, este reforzo pretende ofrecer unha resposta máis rápida e eficaz ante calquera situación que poida xurdir, mellorar o control do tráfico e reforzar a vixilancia nos puntos máis sensíbeis do municipio: “É unha mostra clara do noso compromiso coa seguridade, tanto para a veciñanza como para todas as persoas que nos visitan durante o verán”, comentou.
O obxectivo principal desta iniciativa é mellorar a resposta ante emerxencias, garantir unha maior seguridade e contribuír ao bo desenvolvemento das actividades culturais, deportivas e de lecer que teñen lugar no municipio durante estes meses.
Dende o Concello de Ribeira lembran que esta medida forma parte “dunha estratexia máis ampla para mellorar a seguridade e o benestar de toda a cidadanía”. Neste sentido destacan que nestes dous anos ademais do aumento de axentes tamén se logrou facer o desaloxo do edificio ocupado das Avesadas ou que se está en contacto coa veciñanza de diferentes barrios para consensuar as medidas a implantar coas que mellorar a seguridade.
