O Concello de Boiro colabora co motoclub BoiroMotos nunha nova edición da concentración moteira, BoiroMotos 2025, que se celebra os días 25, 26 e 27 de xullo no parque da Cachada. O alcalde, José Ramón Romero, participou na presentación do programa de actividades xunto con Adrián Blanco e David García, membros da directiva.
O programa de actividades comezará o venres 25d e xullo a partir das 12.00 horas coa recepción de asistentes, chourizada e música aberta ao público e pola tarde inchábeis, adestramentos de coches radio control, exhibición de Stunt e verbena con Deconcerto, DJ Tito Maverick e DJ Places.
O sábado comezan as actividades abertas ao público ás 11.00 horas coa exhibición de motos oldies e clásicas, curso de seguridade viaria para rapazada, inchábeis e adestramentos de coches radiocontrol; mexilloada para todos os públicos co grupo Arume; pola tarde xogos concurso de motos oldies e clásicas, exhibición de Stunt e verbena con DJ Mateo Abelleira, DJ Kike Varela e DJ Places.
As actividades rematan o domingo coa exhibición de Stunt ás 11.45 horas e degustación de paella e mexillóns aberta ao público xeral.
“O programa mestura actividades gratuítas e pensadas para todos os públicos, con exhibicións e tamén propostas musicais”, afirmaron dende a organización.
O alcalde, José Ramón Romero, agradeceu a implicación dos novos membros da directiva “por continuar con esta proposta que atrae a miles de persoas que durante a fin de semana se achegan a Boiro para desfrutar das motos e todas as propostas culturais e gastronómicas que programan dende BoiroMotos”.
