O Camiño da ría de Muros Noia continúa sumando apoios. Así, a Orde do Camiño de Santiago quixo implicarse no recoñecemento á V Ruta Rías Baixas-Camiño de Santiago pola ría de Muros Noia como a peregrinación náutica máis numerosa da historia moderna. “Por iso, cando os peregrinos náuticos completen desde o fito Muros de Auga de Bertamiráns os últimos 12 quilómetros do camiño a pé, serán recibidos fronte ás portas da catedral polo gran mestre da Orde, Miguel Pampín”, explica Santiago Freire, presidente da Asociación de Municipios do Camiño da ría de Muros Noia.
“Desde a Orde do Camiño de Santiago queren facer un recoñecemento tanto aos participantes como á organización deste Ruta Rías Baixas-Camiño de Santiago pola ría de Muros Noia polo éxito desta quinta edición, que reforza enormemente a nosa aposta polo Camiño Marítimo de Santiago a través da ría de Muros Noia”, apunta Freire Abeijón.
A Orde é unha fundación con sede en Compostela da que forman parte 1.633 cabaleiros e damas, número que se incrementará o próximo 19 de xullo durante a celebración da súa XXIX Capítulo Xeral, onde tomarán posesión as novas damas e cabaleiros. Entre os seus obxectivos figuran promover os valores universais do Camiño (esforzo, solidariedade, hospitalidade, xenerosidade), servir de vínculo entre varios continentes para aquelas persoas que profesan a súa respecto ao apóstolo Santiago e que defenden os valores do Camiño, así como difundir o patrimonio cultural e etnográfico dos diferentes roteiros xacobeos, contribuíndo así a promover un turismo cultural, relixioso ou espiritual.
O forte vento motiva un cambio de axenda
En canto á etapa deste xoves 3 de xullo, a Dirección de Navegación, de común acordo cos patróns das 52 embarcacións que participan na Ruta acordaron un cambio no itinerario da peregrinación. “O motivo son os fortes refachos de vento de hoxe, que mañá acougarán e permitirannos retomar a navegación con total normalidade, polo que hoxe optamos por anticipar a xornada lúdica prevista para o venres e que os peregrinos visiten diversos elementos que converten a este xeodestino nun lugar privilexiado”, explica José Antonio Marcote, responsábel de comunicación da Asociación de Municipios do Camiño da Ría de Muros Noia.
Así, os peregrinos deixaron as súas embarcacións fondeadas na Pobra do Caramiñal e dedicaron a xornada para pasear por terra, gozando da excelente gastronomía e dos importantes atractivos turísticos que ofrece a vila e O Barbanza. Un grupo deles optou por desprazarse ata a ría da Estrela, onde visitaron ao longo da xornada enclaves como o Castro de Baroña (Porto do Son), o Monte Louro e a lagoa de Xalfas (Muros), o Mosteiro de Toxosoutos (Lousame) ou o Museo de Láudalas (Noia) ou Ponte Nafonso, un das pontes medievais máis longos de Galicia que une Outes e Noia, entre outros atractivos.
Xornada do venres
Mañá venres 4 de xullo, a expedición partirá da Pobra con destino final o Club Náutico de Portosín (Porto do Son), previo paso por Muros. Entre as 10.30 e as 11.30 horas, en augas da ría de Arousa (entre Rianxo e a Illa de Rúa), o helicóptero Helimer 206 de Salvamento Marítimo simulará o rescate de persoas a bordo dos veleiros Amizade e Verne, participantes na peregrinación. Trátase dun dos exercicios mensuais programados por Salvamento Marítimo para a instrución das súas tripulacións de helicópteros.
Un exercicio que forma parte da Campaña de Verán de Seguridade Náutica que impulsa o Ministerio de Transportes e Movilidad Sostenible a través da Dirección Xeral de Mariña Mercante e a Capitanía Marítima de Vilagarcía de Arousa, en colaboración coa Garda Civil e a Asociación Nacional de Empresas Náuticas. O seu lema é Mitos que fan augas. Fai oídos xordos aos cantos de sirena e escoita a lei do mar e pretende ser unha reflexión sobre trolas e hábitos adquiridos á hora de navegar que, en moito ocasións, son os responsábeis das emerxencias de náutica de recreo, que supoñen case un 50% das emerxencias marítimas que se producen durante o verán.
Tralo exercicio de Salvamento Marítimo, a frota da V Ruta Rías Baixas-Camiño de Santiago pola ría de Muros Noia continuará navegando ata o porto de Muros, onde farán escala, para despois dirixirse ao Club Náutico de Portosín, onde terá lugar unha recepción oficial e unha cea. Ademais, á chegada a Portosín (Porto do Son), os participantes poderán realizar unha visita guiada ao buque ES Regulus e asistir a unha charla impartida polo xefe do Centro de Tráfico e Seguridade Marítima de Fisterra, centrada na prevención de emerxencias e o cumprimento da normativa vixente.
Un itinerario con alma
Un total de 52 embarcacións participan nesta edición 2025, que se celebra do 30 de xuño ao 5 de xullo e que permite aos tripulantes vivir a experiencia do Camiño de Santiago pola ría de Muros Noia, recuperando unha tradición que se remonta á Idade Media, cando peregrinos de toda Europa chegaban por vía marítima a Galicia. O roteiro segue o itinerario dunha desas peregrinacións, a do navegante veneciano Pietro Querini (1431).
Unha peregrinación especial pois establece 3 feitos constituíntes do Camiño da ría de Muros Noia: o punto de inicio (o porto de Muros), a distancia (73 km) e o trazado. Ademais, forma parte do itinerario galego da Vía Querinissima, que está á espera do seu recoñecemento como itinerario cultural europeo. De feito, a Asociación Vía Querinissima conta cunha caseta na V Ruta Rías Baixas-Camiño de Santiago da ría de Muros Noia, no que dá a coñecer a actividade desta entidade cultural sen ánimo de lucro nacida fai máis dunha década a raíz dun primeiro acordo de amizade entre os municipios de Rost (Noruega) e Sandrigo (Italia) e despois dun convenio de cooperación cultural e económica entre as rexións de Nordland e Véneto. Esta asociación promove un turismo cultural e enogastronómico pausado e sostíbel, que une cidades e rexións de trece países distintos.
