A estas alturas ningún verán no Barbanza pode presumir de ser un verán como ten que ser sen unha nova edición da Festa Hortera de Porto do Son, a festa charramangueira por excelencia do estío na nosa comarca. Coa nova edición, que se celebra os días 1 e 2 de agosto nas rúas da vila sonense, volven as homenaxes ás divas e aos divos que inspiraron a quen reivindicou a diversidade plena no xeito de vestir… e vivir. Desta volta, renderase tributo ao grupo inglés Queen, liderado polo seu carismático (e moitas veces charramangueiro) líder Freddy Mercury.
A Festa Hortera de Porto do Son celebrarase novamente na primeira fin de semana de agosto. Os días vindeiros daranse a coñecer máis detalles da axenda. Unha vez máis, a celebración será o principal marco de referencia da vertente charramangueira que todas e todos, en maior ou menor medida, levamos dentro. A Festa Hortera conta coa colaboración do Concello.
“Queen representa á perfección o espírito da Festa Hortera de Porto do Son, co seu compoñente de liberdade e paixón”, sinalaron recentemente dende a organización da festa, adiantando que a axenda virá ateigada de desfiles de moda, concertos, probas deportivas (a tradicional carreira de tacóns) e por suposto homenaxes DJ a Queen e aos seus grandes éxitos.
