A sede da antiga Fábrica de Sel en Muros acolleu a presentación do libro Alejandro Viana. Un galego á fronte do rescate dos refuxiados republicano’, de Roberto Mera Covas, que acudiu á cita acompañado da alcaldesa María Lago e máis da concelleira de Lingua, Laura Rivadeneira. Na presentación o autor repasou os principais feitos da vida de Alejandro Viana, protagonista do libro, que salvou a milleiros de refuxiados republicanos tras a Guerra Civil.
“Esta obra é un acto de xustiza con persoas como Alejandro Viana, que deron a cara polos demais e demostraron a súa heroicidade nun contexto moi complicado”, afirmou María Lago, quen lembrou que a obra, publicada polo selo editorial Belagua, obtivo entre outros recoñecementos o Premio de Investigación e Ensaio Antón Losada Diéguez 2022.
Sinopse
Na Europa ocupada polos nazis miles de exiliados republicanos españois devecían por chegar a América para salvar as súas vidas. Entre eles atopábase Alejandro Viana Esperón (Ponteareas, 1877 - México DF, 1952), deputado republicano de esquerdas ao que ben se podería alcumar como o Schindler galego.
Á fronte de varias organizacións humanitarias, entre elas o Servicio de Evacuación de Refugiados Españoles, Alejandro Viana organizou dende Francia a saída de miles de refuxiados nunha trintena de expedicións marítimas colectivas a distintos países de América, na súa maioría a México.
Cos alemáns en Francia, Viana arriscou a súa vida para continuar axudando os exiliados até que, acosado pola Falanxe e a Gestapo, emprendeu en 1941 unha desesperada fuxida. Logo de once meses de anguriante viaxe por África, logrou chegar a México. Alí reencontrouse tempo despois coa súa dona, tras once anos de separación, e viviu coa certeza de que xamais podería retornar á súa terra.
Sobre o autor
Roberto Mera Covas (Ponteareas, 1971), é licenciado en Dereito e Ciencias Políticas e da Administración pola Universidade de Santiago de Compostela. É avogado e politicólogo.
