Inscricións do 9 ao 13 de xuño.· Cada persoa poderá solicitar praza en tódalas actividades que lle sexan de
interese
O Concello de Ribeira vén de presentar a súa programación de Actividades Deportivas para o Verán 2025, unha ampla oferta dirixida á mocidade co obxectivo de fomentar o ocio activo e saudable durante os meses estivais.
No acto de presentación participaron o concelleiro de Deportes, Xabier Vidal, a concelleira de Cultura, Antía Alberte, e os técnicos municipais das áreas de Deportes e Xuventude.
Vidal anunciou que este ano haberá oito escolas deportivas en terra, entre as que se inclúen: baloncesto, “nada e corre”, pádel, patinaxe, psicomotricidade, tenis, voleipraia e xadrez. “Intentamos cubrir o ocio da xente máis nova e da mocidade de Ribeira a través do deporte ao longo de todo o verán”, sinalou o edil, quen tamén animou á inscrición destacando o prezo accesible das actividades. En total, haberá 330 prazas cun custo de 18,60 euros por persoa.
Pola súa parte, Antía Alberte detallou a oferta náutica, que inclúe cursos de iniciación á vela, surf, windsurf, paddle surf e kaiac. Estas actividades están destinadas a nenos e nenas nados entre 2006 e 2016, sendo o único requisito indispensable saber nadar. Os prezos serán de 25 euros para vela e 50 euros para o resto das actividades acuáticas.
As clases de surf impartiranse nas praias do Vilar e da Ladeira, mentres que as de windsurf, paddle surf e kaiac terán lugar na praia de Coroso. As prazas definitivas publicaranse o 23 de xuño, e o prazo para realizar o pagamento rematará o 30 de xuño.
A concelleira quixo agradecer especialmente o traballo do persoal técnico municipal, “porque sen eles non sería posible contar con esta gran variedade de propostas”.
